أساسيات التسويق عبر شبكات التواصل الاجتماعي (الجزء الأول)

المقال ده يعتبر كورس دسم جدا و مجاني فى التسويق عبر شبكات التواصل الإجتماعي ( Social Media Marketing ).

أنت لو رحت أخدت كورس عند أى حد ، هتدفع أرقام كبيرة واحتمال ما تاخدش نفس القيمة اللى هتطلع بيها من المقال ده.

المقال ده تغطية شاملة لعلم الـ Social Media Marketing ، عشان فى الاخر تخرج بخارطة طريق أو بوصلة تساعدك في الإنتقال من مستوى لمستوى تاني لحد ما توصل لأعلى مرتبة علمية ووظيفية ممكنة في المجال.

من وجهة نظري الشخصية، إن العلم ده مبني على 7 محاور أساسية مفيش غيرهم، وعشان تكون متميز فى المجال ده، لازم تكون ماسك السبع محاور كويس اوى.

الموضوع مش صعب، ركز أنت معايا وبإذن الله هتلاقي الكلام سهل وبسيط.

المقال ده طويل (طويل جدا) ولكنك فعليا مش محتاج غيره عشان تبدأ تتوغل فى جذور العلم ده وتجيب آخره ، فالوقت اللي هتقضيه وانت بتقرا مش هيضيع هباء.

يلا نبدأ …

الـ Marketing و الـ Media و الـ Social

عمرك فكرت هي إسمها Social Media Marketing ولا إسمها Marketing Media Social؟

المحور الأول: يعني ايه Marketing؟

قبل ما أقولك أحد تعريفات علم التسويق اللي انا مقتنع بيها ، لازم تفهم الأول إن لو التعريف أو المنظور اللي انت متبنيه مش هيخليك تنفذ بسهولة يبقى التعريف ده مش دقيق وتنظير على الفاضي.

التعريفات تعتبر حدود الحاجة اللى بيتم تعريفها ، مثلا أسامة صلاح طويل و الدغ ، لو صفة من دول سقطت عني مش هاكون أسامة صلاح ، وضحت الفكرة؟

يعني ايه Marketing؟

بإختصار هو فن وعلم خلق الطلب على خدمة أو منتج بيقوم بحل مشكلة حقيقية أو إشباع إحتياج عند مجموعة محددة من الناس، بطريقة تلبي توقعاتهم ، و بسعر يقدروا ومستعدين يدفعوه.

أو

ازاى تخلى الناس تدفع لك انتباهها ، وتلاحظ وجود شركتك ، وتطلب اللي بتبيعه ، وتقول لكل الناس عليك.

إذن لازم تعرف أساسيات التسويق كويس أوي.

من وجهة نظري لو فهمت التعريف اللي فوق ده كويس أوى ، و تأملته و فصصته كويس ؛ هيكون معاك كل اللى أنت محتاجه عشان تعمل تسويق لشركتك عبر شبكات التواصل الاجتماعي.

المحور الثاني: يعني ايه Media؟

طيب، عشان تخلق طلب على منتج ، لازم الناس تكون عارفاه في المقام الأول ، وبعدين يشوفوا اذا كان مناسب ليهم ولا لا …

الشركات عايزة تبيع منتجاتها وتكسب ، بس عارفة إن ده مش هيحصل الا لو الناس أصلا عرفوا انهم بيبيعوا المنتجات دي ، وبناء عليه قامت الشركات دي تدور على أحسن وسيلة ممكن يقولوا بيها للناس أن المنتج الفلاني ممكن ينفعهم ، وكانت الوسيلة دي هي الـ Media.

الـ Media اللى هى وسائل الإعلام ، يعني الوسائل اللى بنعرف أو “بنعلم” بيها المعلومات اللى عايزين نعرفها ، والميديا أنواع فيه الـ Paid والـ Owned والـ Earned وفيه الـ Free.

• الـ Paid Media ….

زمان كان فيه Mass Production يعني الشركات كانت بتصنع منتجات متشابهة بكميات كبيرة جدا ، وبالتالي كانت الشركات بتروح تتكلم مع Mass Market يعني عموم الجماهير كلهم مع بعض ، وبالتالي كنا محتاجين Mass Media كل الناس دي بتتفرج عليها عشان نقدر نوصل لهم.

وبناء عليه كانت القاعدة ” شوف أكتر مكان الناس بتبص عليه واجر لنا فيه ساعة ولا حاجة “.

• الـ Owned Media ….

وانت بتدور على شقة عشان تتجوز فيها ، أكيد سمعت النصيحة بتاعت يابني اياك والتأجير ، اشتري حاجة بتاعتك احسن عشان المستقبل.

ليه يا عم تروح تاجر من حد حتة تقعد فيها شوية ، وانت ممكن تبني العمارة بتاعتك تقعد فيها العمر كله.

فيه تسويق يبني شركة، وتسويق يساعد الشركة تفضل واقفة على حيلها لفترة ، وتسويق بيهد الشركة!

ملناش دعوة بالتسويق اللى يهد الشركة، وكمان مش من المنطقي إن تعتمد على تسويق مؤقت ، إذن مفيش قدامك غير أنك تعتمد على التسويق اللى يبني الشركة.

التسويق اللى يبني الشركة هو التسويق اللى بيبني Marketing Assets يساعد الشركة وقت ما الميزانية تخلص!

هو يعني إيه أصلا Asset؟

يعني ” مورد له فائدة إقتصادية تملكه أو تتحكم فيه الشركة وتستطيع توليد منه الربح مستقبلا”.

إذن الاتجاه بتاع الشركة اللى انت شغال فيها المفروض يتحول من كونه بيروح يستلف ميكروفون مش بتاعه لمجرد أن الميكروفون ده بيسمعوه ناس كتير ، لـ أنه يصنع الميكروفون بتاعه ، يعني يتحول من كونه بيعتمد على الـ Advertising ليتجه لبناء Marketing Assets تعيش معاه العمر كله.

• الـ Earned Media ….

كلمة Earned يعني يجني أو يكسب ، وهنا انت لا بتدفع ابيض ولا احمر ، انت بتخلي الـ Media تتكلم عنك ، ودي في الأغلب بتبقى مهمة تخصص مغضوب عليه فى مصر والسبب مجهول وهو الـ PR.

أحد أهم أشكال الـ الـ Earned Media هي الـ Word of Mouth واللى بيتولد أما تعمل حاجة تستاهل إن الناس تتكلم عنها ، و دلوقتى بيتم كسب الـ Media بأحدإستراتيجيات الـ Content Marketing وهي الـ Viral Content.

• الـ Free Media …

والمتمثلة فى قنوات السوشيال ميديا و محركات البحث (الجزء الـ Organic) ودي ببلاش بس محتاجه حد فاهم كويس أوى وصايع فى نفس الوقت ، عشان يستغلها لصالح الشركة اللي بيشتغل لحسابها.

إذن لازم تتعلم لعبة الـ Media بأنواعها وازاى تستخدمها في صالح البيزنس بتاعك.

المحور الثالث: يعني ايه Social؟

دايما بقول إن بتطور التكولوجيا، التسويق بيتطور.

زمان الـ Media كانت عبارة عن التلفاز والراديو والمجلات والجرايد اللى وقت ظهور كل حاجة من دول، كان فيه ثورة فى التسويق.

بس كل وسائل الإعلام دى فيها عيب وهو أنها إتجاه واحد.

زمان اللي معاه الميكروفون كان يقدر يقول اللى هو عايزه فى أي حتة ، وقت ما يحب ، بس دلوقتي الريموت بقا مع الناس ، الناس تقدر تـ Skip اللي مش عاجباه فى أي وقت ، الناس ممكن تـ Ignore أي حاجة مش عاجبها ومش عايزة تسمعها ، ده أصلا الناس بطبعها بتتجاهل الحاجات اللى مش عايزة تسمعها أو مش مفيدة ليها.

نتيجة للى فات ده ومع ظهور الإنترنت ، طلع شوية ناس قالوا طب ما نخلي الطريق رايح جاي ، ونخلي الريموت في أيد الناس ، فظهر نوع جديد من الميديا يتميز بأنه طابعه Social ، واتسمت Social Media.

طب ويعني ايه Social؟

يعني إجتماع ، مجتمع ، ناس ، قبائل ..

وده معناه إن اللي ماينفعش أو مايصحش يحصل في الحياة الواقعية بين الناس وبعضها ، ماينفعش يتعمل في الـ Social Media.

مثلا مينفعش أما واحد صاحبك يحكيلك مشكلة ويطلب منك حلها ، تتأخر في الرد عليه او تنفض له ، وبالمثل على الـ Social Media ماينفعش تتجاهل مشاكل الـ Fans لأنك لو عملت كده هتكون بتتعامل مع الـ SM على أنها Traditional Media زي بتاعت زمان.

إذن من قوانين الاجتماع اللي بنستخدمها يوميا في حياتنا ، هنطلع قوانين لأيه اللي ينفع وايه اللي ماينفعش في عالم الـ Social Media زي ما وضحت في المثال.

وبالتالي لو حد قالك تعالي أديك كورس ، أعلمك فيه 10 ولا 100 قانون في السوشيال ميديا بمبلغ وقدره ، قوله لا شكرا ، انا عارف كل حاجة ، اللي ينفع في الحياة الواقعية ينفع في السوشيال ميديا ، واللى ماينفعش في الحياة الواقعية ، ماينفعش في السوشيال ميديا.

الخلاصة:

التسويق عبر شبكات التواصل الاجتماعي هو  فن وعلم خلق الطلب على خدمة أو منتج يقوم بحل مشكلة حقيقية لدى مجموعة محددة من الناس أو يشبع احتياج لديهم ، بطريقة تلبي توقعاتهم ، و بسعر يستطيعون ويريدون دفعه ، بإستخدام أو من خلال وسائل التواصل الإجتماعي.

إذن فيه 3 علوم لازم يكون عنده فكرة قوية عنهم وهما:

الـ Marketing

الـ Media

الـ Sociology

الـ Business و الـ Technology و الـ Psychology

العلوم التلاتة دول اللي مبنى عليهم تقريبا أغلب الاختراعات اللي انت بتشوفها وهتشوفها ، كل شركة من اللي غيروا العالم بتاعك اعتمدت بشكل كامل على واحد من العلوم التلاتة دول ، فكر كده!

المحور الرابع: يعني ايه Business؟

التسويق عبر شبكات التواصل الاجتماعي جزء من التسويق ، والتسويق جزء من الـ Business ، وإحنا قولنا يعني ايه SMM ويعني ايه تسويق.

يبقي ناقص لنا حاجة مهمة جدا – ومن وجهة نظري سبب في إخفاق ناس كتيرة في المجال ده في مصر – وهي يعني ايه Business؟

البيزنس هو عملية متكررة لخلق وتوصيل قيمة يريدها أو يحتاجها الناس ، بسعر سوف يدفعونه ، وبطريقة تشبع احتياجاتهم وتلبي توقعاتهم ، وذلك حتى يستطيع العمل التجاري تحقيق الربح الذي يضمن له الاستمرار ، لتكرار تلك العملية مرة أخرى.

كل كلمة في التعريف اللي فات ليها مدلول وتعتبر تاسك معين جوه أي شركة ، ولو البيزنس فشل لا قدر الله ، يبقى بسبب حاجة من الحاجات الموجودة في التعريف ، عرفتوا بقى أهمية التعريفات العملية؟!

إذن لازم تكون فاهم اساسيات البيزنس ، فاهم يعني ايه Value Creation ، وأساسيات الـ Finance ، والـ Branding إلخ إلخ ، وده عشان لو حصل مشكلة تكون عارف مصدرها أو الحتة اللي فيها خلل ، مش تجري على طول وتقول على نفسك مش عارف تشتغل ، أو العيب في الـ Marketing.

بالإضافة إن بفهمك للبيزنس هتكون قادر تفهم البيزنس اللي بتشغل فيه بشكل أفضل ، وبالتالي ده هينعكس على شغل الـ SMM.

المحور الخامس: التكنولوجيا …

الـ Social media عبارة عن مواقع إلكترونية ، موجودة فين؟ أيوة على الإنترنت ، والإنترنت ده أصلا تكنولوجيا ، إذا لازم نفهم تكنولوجيا عشان نعرف نتعامل ونستفيد الاستفادة القصوى من السوشيال ميديا.

---

 تاريخ الـ Marketing مرهون بتاريخ تطور التكنولوجيا …

اخترعوا الورق والحبر فـ أبتدي الناس تستخدمه في التسويق لأفكارها.

اخترعوا الراديو فـ أبتدي الناس تستخدمه في التسويق للى عايزينه.

اخترعوا التلفزيون فـ أبتدي الناس تستخدمه في التسويق لمنتجاتها.

اخترعوا التلفونات فـ أبتدي الناس تستخدمه في التسويق لنفسها.

اخترعوا الكومبيوترات والإيميلات فـ أبتدي الناس تستخدمه في التسويق اللى بتبيعه.

اخترعوا الإنترنت  فـ أبتدي الناس تستخدمه في التسويق لأفكارها وشركاتها.

مع كل إختراع من دول الـ Marketing كان واخد إتجاه معين وليه قواعد بينه ، إذن على حسب الاختراع اللي جاي ، هيتغير الـ Marketing تبعا ليه.

---

الكلام ده منقول من كتاب Content Marketing Principles!

ماذا بعد سناب شات؟

لو مش فاهم تكنولوجيا عمرك ما هتعرف تجاوب على السؤال ده ، ولا هتعرف تستخدم أصلا سناب شات في التسويق لشركتك.

ازاى الفيسبوك بيشتغل؟ ازاى تويتر بيرتب الأخبار والهاشتاج؟ ايه منهجية انستجرام في عرض الصور؟ وغيرها من الأسئلة اللي عشان تجاوبها لازم تفهم وتدرس التكنولوجيا اللي الشركات دى بنستخدمها ، مع فهم لمعنى التكنولوجيا وتاريخها.

بالشكل ده هتقدر تروح بالسوشيال ميديا لمستوى تاني أبعد من اللي وصل ليه أي حد.

المحور السادس: علم النفس …

خدها قاعدة عامة كده ، أي علم ليه صلة مع الإنسان ، لازم تدرس جمبه علم نفس على طول ، طب تدرس العلم ده بشكل أكاديمي؟ طبعا لا ، علم النفس من وجهة نظري مهارة وعلم ، مهارة ملاحظة وتحليل سلوكيات البشر ، واللي بيثقل المهارة دى العلم نفسه.

إذن لازم تدرس علم النفس ، وتعرف أهم وأشهر قوانين اللي بتفسر سلوكيات البشر وبتقولنا ليه بنعمل كذا أما يحصل كذا ، وهكذا.

الخلاصة:

علم التسويق عبر شبكات التواصل الاجتماعي مربوط بالـ Business وبالـ Technology وبالـ Psychology …

ومتنساش التلاتة الأولانين (الـ Marketing و الـ Media و الـ Sociology).

…

الأجزاء الستة اللي فاتوا دول يعتبروا بمثابة البنية التحتية عشان تكون قادر تشتغل الشغلانة دى صح ، وعشان تقدر ترتقي من مستوى لمستوي لحد ما تقفل اللعبة ، وعشان تساعدك في تكوين Mindset قوية وصحيحة من خلالها تقدر تحقق نجاحات استثنائية بإذن الله.

بالنسبة للتطبيق بقا؟

الحاجات اللى فوق دى زى ما انا لسه قايل Mindset و Foundation ، ولكن أرض المعمعة فين بقا؟

الـ Strategy

الـ Content

الـ Responding

الـ Advertising

الـ Analytics

دول خمسة أجزاء تنقسم ليهم الـ Social Media Marketing في الشغل العملي، ودول بقى موضوع الجزء الثاني  ، لكن دلوقتي هادي Hint سريع كده عن كل نقطة فيهم.

أولا الـ Strategy …

من أكتر الـ Frameworks اللي أعتقد أنه مفتاح لنجاح أي بيزنس ، هو Goal – Strategy – Tactics …

لازم يكون فيه هدف البيزنس عايز يوصل ليه ، فنقوم نشوف هنوصل له ازاى ، وبعدين ناخد خطوات فعلية للتنفيذ عشان نوصل هناك.

على سبيل المثال ، عايز اروح من منطقة أ لمنطقة ب ، ممكن أخد الدائري ، هاسخن العربية واركب واسوق لحد ما أوصل .. مفهومة؟!

إذن أول جزء من الجانب العملي من الـ Social Media Marketing هي الـ Strategy واللى عشان تتعمل لازم يكون اللي هيعملها معاه Business Goals ، اللي هيخرج منها Social Media Goals ، يتعمل لها Strategy عشان نحققها.

ولو مفيش Strategy يبقي فيه فوضى ، وفى وجود الفوضى تحدث الهزائم.

ثانيا الـ Content ….

باختصار المحتوى هو بنزين السوشيال ميديا ، وبنزين أى ميديا ، والمحتوى ده ليه اصول مش اي كلمتين وخلاص يبقوا محتوى.

بس المطلوب منك كـ Social Media Marketer أنك تطلع محتوى ذات طابع اجتماعي ، وهنا هنستخدم شوية الحاجات اللي المفروض اتعلمناها في علم الإجتماع وعلم النفس في صناعة حدث حوالين فكرة معينة ، ودى قصة كبيرة أوى هنتكلم عنها في وقتها.

ثالثا الـ Responding …

الجزء الأهم من وجهة نظري بعد المحتوى في السوشيال ميديا وفى الـ Marketing عموما ، الموضوع مش رد على كام رسالة وكام كومنت والسلام ، الموضوع أعمق من كده ، مش هتحس بالعمق بتاعه إلا أما تدرك أنك بتحل مشكلة منغصة حياة إنسان استنجد بيك ووثق في شركتك ، الـ Responding حرفيا فن مش عن عن.

رابعا الـ Ads

الجزء الأكثر شهرة في المجال في مصر ، وده نابع من فهم وتعامل شريحة كبيرة من السوق إعلانات السوشيال ميديا بديل إعلانات التلفاز وما شابه ، وفي الحقيقة ده مش غلط ، ولكن فهمه بالطريقة دى هو اللى غلط ، لان زي ما قولت في الاول إحنا موجودين جوه السوشيال ميديا ، ماينفعش نتعامل معاها على أنها ميديا عادية .. بس كده.

الصح هو إستخدام الإعلانات دي في نشر حل المشكلة الحقيقية اللي البيزنس بتاعك بيحلها على نطاق أوسع مش أكتر من كده.

خامسا الـ Analytics

ببساطة التحليل في التسويق عموما هو الكشاف اللي هتشوف بيه الطريق قدامك.

بس كده .. التفاصيل بقي في الجزء التانى ، استنونا 

شارك المقال